الرباعيات هي أحب قوالب الشعر عندي لانها تعيين علي نفي الفضول
وعلي التحرر من أسر القافية فتجئ كل رباعية بمثابة الومضه
المتألقة أو بمثابة الحجر الكريم والذي تكمن قيمته في اختصاره
لا الي كبر حجمه
هذه هي اولي الكلمات التي بدأ بها الاستاذ يحي حقي تقديمه
للكتيب الذي جمع فيه رباعيات جاهين ولم اجد افضل من ذلك
تقدمه لما سأكتبه لكم من رباعياته
فتحت شباكي لشمس الصباح
مدخلش منه غير عويل الرياح
وفتحت قلبي عشان أبوح بالالم
ما خرجش منه غير محبه وسماح
عجبي...
مع إن كل الخلق من أصل طين
وكلهم بينزلو مغمــــــــــضين
بعد الدقايق والشهور والسنين
تلاقي ناس أشرار وناس طيبين
وعجبي...
وانا في الضلام من غير شعاع يهتكه
أقف مكاني بخوف ولا اتركه
ولما يجي النور وأشوف الدروب
احتار زياده ايهم أسلكه؟
وعجبي...
نظرت في الملكوت كتير وانشغلت
وبكل كلمة (ليه؟)( وعشانيه؟) سألت
أسأل سؤال الرد يرجع سؤال
واخرج وحيرتي أشد مما دخلت
وعجبي....
عجبتني كلمه من كلام الورق
النور شرق بين حروفها وبرق
حبيت أشيلها في قلبي قالت حرام
ده انا كل قلب دخلت فيه اتحرق
وعحبي...
يوم قلت أه..سمعوني قالو فسد
ده كان جدع قلبه حديد واتحسد
رديت علي اللايمين أنا وقلت..أه
لو تعرفو معني زئير الاسد
وعجبي...
أنا قلبي كان شخشيخه أصبح جرس
جلجلت به صحيو الخدم والحرس
أنا المهرج..قمتو ليه خفتو ليه
لاف إيدي سيف ولا تحت مني فرس
وعجبي...
دخل الربيع يضحك لقاني حزين
نده الربيع علي إسمي لم قلت مين
حط الربيع أزهاره جنبي وراح
وإيش تعمل الازهار للميتين
وعجبي...
حبيت لكن حب من غير حنان
وصاحبت لكن صحبه ما لهاش أمان
رحت لحكيم واكتر لقيت بلوتي
إن اللي جوه القلب مش ع اللسان
وعجبيي...
إقلع غماك يا تور وارفض تلف
إكسر تروس الساقيه واشتم وتف
قال:بس خطوه كمان..وخطوه كمان
يا أوصل نهاية السكة يا البير يجف
وعجبي...
الفيلسوف قاعد يفكر سيبوه
لا تعملوه سلطان ولا تصلبوه
ما تعرفوش إن الفلاسفة يا هوة
اللي يقولوه بيرجعو يكدبوه
وعجبي...
الدنيا اوده كبيره للانتظار
فيها ابن ادم زيه زي الحمار
الهم واحد .. والملل مشترك
ومفيش حمار بيحاول الانتحار
وعجبي...
دي مذكرات وكتبتها من سنين
في نوتة زرقا لون بحور الحنين
عترت فيها..رمتها في المهملات
وقلت أما صحيح كلام مخبولين
وعجبي...
كيف شفت قلبي والنبي يا طبيب
همد ومات والا سامع له دبيب
قاللي لقيته مختنق بالدموع
ومالوش دوا غير لمسه من إيد حبيب
وعجبي...
بجد صلاح جاهين كان فنان وكل كلمه قالها في كل رباعيه بجد حكمه
انا اخترت تلك الرباعيات من كم كبير وكان نفسي انقل اليكم اكثر من ذلك
لكن كفايه علينا كدا واتمني تنال رضائكم
تحياتي
10 comments:
موضوع جميل والرباعيات اللي اخترتيها أجمل
أنا من عشاق كتابات جاهين سواء الرباعيات أو اشعاره الأخرى
بحس إن كلامه من القلب وبيحمل حكمة زي ما قلتي
واسمحي لي احط رباعية أخرى هنا
قالوا الشقيق بيمص دم الشقيق
والناس مهياش ناس بحق وحقيق
قلبي رميته وجبت قلب حجر
داب الحجر ورجعت قلبي رقيق
وعجبي
تحياتي ..
طبعا رباعيات صلاح جاهين عمل أدبي خالد ومحدش يقدر يقول غير كده
اختياراتك رائعة
دخل الربيع يضحك لقاني حزين
نده الربيع علي إسمي لم قلت مين
حط الربيع أزهاره جنبي وراح وإيش تعمل الازهار للميتين
وعجبي
لمستنى اوى الرباعية دى
ومقدرش انكر ان رباعيات جاهين رائعة فوق كل حدود الوصف
تحياتى يا جميلة
:)
أنا شاب لكن عمري ولا ألف عام
وحيد .. لكن بين ضلوعى زحام
خايف... بس خوفي جوه مني
أنا ساكت ..لكن قلبى مليان كلام
وعجبي
تحيـــــــاتي
بجد روعة
تسلم ايدك
جزاكي الله خير
هبه
طبعا انا مبسوطه جدا لانك اول حد دايما بيعلق ويدخل ويقول رأيه ودائما ارائك مثمرة
اشكرك علي زياراتك التي دائما ما اشرف بها
تحياتي
-----------------------------------
أحمد منتصر
اشكرك زيارتك احمد سعدت بمرورك واتمني دائما اختياراتي تنال اعجابكم
تحياتي
-----------------------------------
حدوته
اولا بعتذر لاني مش رحنا مع بعض معرض الكتاب واكيد زياره افتقدتها معاكي
لكن ان شاء الله اعدك بتعويض الخروجه
وطبعا اشكر تشريفك ليا ويا رب تكوني دايما سعيده ومحققه كل الاحلام الجميله
-----------------------------------
انونميس
مرور عطر واكيد فيه اضافه
سعدت بمرورك وارجو تكرارها
تحياتي
-----------------------------------
عابد الرحمن
مرورق دائما رقيق ومبسوطه ان اختياراتي نالت اعجابك
تحيايي
صلاح جاهين شاعر كبير وكتير امتعنا بكلماته الجميله
بجد اختيار موفق وياريت تمتعنيا بمزيد من كلماته
تحياتي وسلامي
عزيزي راك
اولا صباح الخير
ثانيا طلباتك اوامر وان شاء الله اكتبلكم المزيد وسعدت بمرورك
تحياتي
من اجمل الحاجات اللي قريتها و اثرت فيا و عجبتني هي الرباعيات دي
شكرا لنقلك و كلماتك
تحياتي
الرباعيات دي احلى حاجه اتكتبت
بجد كل الرباعيات عبقرية وكل ما اقراهم تانى افهم معانى اكتر واكتر
Post a Comment